ONM-ABO Adoolessa 17, 2024
Humni finxaaleessaan Amaaraa kun fedhii lafa babalifannaaf qaban irraa kan ka’an garee imphaayera Itoophiyaan kan deggeraman yeroodhaa gara yerootti Oromiyaa bakkoota hedduutti uummata Oromoo irratti yakki isaan dalagan daangaa kan hin qabnee fi ammas gocha kana itti fufanii jiraachuun, keessattuu torban kanas bifa addaan qindaa’anii ka’anii jiru jechuun jiraattoonni dubbatu.
Haaluma kanaan godina Baha Wallaggaa aanaa Limmuu Galiilaa ganda Bakkoo Guddinaa jedhamu keessatti Adoolessa 16, 2024 hidhattoonni badii Faannoo nama nagaa hojii isaa hojjetu bakka qonnaa isaatti osoo inni qonna qotuu rasaasa itti roobsuun obbo Dassaalee Angaa nama jedhamu ajjeesan. Nama du’e kana malees hedduun lubbuu ofii olfachuuf baqatanii bosona bulaa jiraachuu jiraattotni ibsan.
Gochi duguuggaa sanyii fi fedhii lafa baballifannaaf finxaaleeyyonni Amaaraa sirnichaan tumsamuun raawwachaa jiran kun uummata Oromoo irratti dhiibbaa uumaa jira. Jiraataan tokko akka ONM’f yaada isaa qoodetti Uummanni Oromoo tokkummaan ka’ee yoo qolate malee lafa, qabeenyaa fi nama keenya qe’ee keenya irratti dhabuuf deemna jechuun yaada isaa ibse.
