ONM-ABO Hagayya 1, 2024
Manni murtii Giinii hogganaa garee mootummaa waraanaa duraanii Muusaa Dadis Kaamaaraa Roobii kaleessaa yakka dhala namaa irratti raawwateen yakkamaa ta’uun isaa erga mirkanaa’ee booda hidhaa waggaa 20 itti murteesse.
Kaamaaraa fi kanneen biroo bara 2009 hiriira deggersa dimokiraasii irratti namoota 150 ol ajjeesuun wal qabatee ajjeechaa, gudeeddii, dararaa fi butamuun namootaan himataman.
Pireezidaantiin mana murtii kanaa Ibraahimaa Soorii Toonkaraa, ”Muussas Daadis Kaamaaraa itti gaafatamummaa sadarkaa olaanaa irratti hundaa’uun yakka dhala namaa irratti raawwateen yakkamaa ta’uu isaa labsuun sirrii dha,” jedhan.
Ajajoonni waraanaa duraanii biroo hedduunis yakka dhala namaa irratti raawwataniin yakkamaa ta’uun murtii umurii guutuu itti murtaa’eera. Himatamtoonni afur balleessaa akka hin qabne argameera.
Abukaatoon haqaa idil-addunyaa Human Rights Watch Tamaraa Aburaamadan dhaddachi Roobii kaleessaa gaggeeffame miidhamtootaa fi maatii isaaniif ”yeroo dhugaa yeroo dheeraaf eegamaa ture ” jedhan.
Kaamaaraan dhuma bara 2008 fonqolcha mootummaatiin aangoo qabate. Hanga jalqaba bara 2010’tti hogganaa mootummaa waraanaa ta’uun Giinii bulchaa ture.
Bara 2009’tti namoonni kuma kudhaniin lakkaa’aman istaadiyeemii Koonaakrii tokkotti walitti qabamanii Kaamaaraan bara itti aanutti filannootti akka hin dhiyaanne dhiibbaa godhaniiru. Loltoonni mormitoota irratti dhukaasuu, waraanuu fi reebuun, kaan ammoo humnoonni nageenyaa gaazii imimmaanessu erga itti dhukaasanii booda waldhabdee uumameen bittinna’aniiru.
Dhaddacha irratti miidhamtoonni gara 100 ta’an ragaa nama sirrii kennaniiru jechuun Dooch Waleen gabaaseera.
