ONM-ABO Onkoloolessa 27, 2024
Ergamtoonni bilxiginnaa yeroo adda addaatti maqaa kaffaltii gosa adda addaa hawaasni hin beekne itti dhahuun saamicha ulfaataa ta’e irratti geggeessanii ittiin of jiraachisaa jiru.
Godina Buunnoo Beddellee aanaa Daaboo Haannaatti waraanni faashistii bilxiginnaa hawaasa irratti saamicha raawwachuu jabeessanii jiraachuun ibsameera.
Gandoota aanichaa hunda keessaa maqaa “gamoo waajjira galii ijaarra” jedhuun hawaasa aanichaa hunda irraa qarshii dhibba sadi sadii humnaan saamaa jiraachuu jiraattonni aanichaa dubbisne ONM’f himan.
Kana malees, kan milishaa qarshii 200 walitti guurrataa kan jiran biratti, qarshii miseensa dhaabaa” maqaa jedhuun immoo qarshii 51 hawaasa gandichaa hunda irraa walitti qabatanii, faayidaa dhuunfaa isaanii irra oolfachaa jiraachuu maddeen itti dabaluun Arraata Biyyoolessa Oromiyaaf himanii jiru.
Aanichatti saamichi qabeenyaa seera hin qabne uummata irratti raawwachaa kan jiru yoo ta’u, inni yeroo ammaa immoo kan duraan barameen ol ta’uun hawaasicha yaaddessee jiraachuun himamee jira.
