ONM-ABO Sadaasa 8, 2024
Gargaarsi namoomaa akka darbuuf haala mijeessuuf ji’oota sadiif Sudaan koridoorii daangaa qaxxaamuraa Adree banaa ta’ee akka turuuf hanga ammaatti murteen hin kennamne jechuun ergamni Sudaan Mootummoota Gamtoomanii Jenevaatti argamu Kamisa kaleessaa ibseera.
Bakka bu’aan dhaabbataa Sudaan Hassan Hamid Hassan, koridoorii kun garee waraanaa gartokkee Humnoota dafee qaqqabaa (RSF)tti “meeshaa waraanaa geejjibuuf” karaa sirrii hin taaneen itti fayyadamaa jira jechuun yaaddoo mootummaa irra deebi’ee ibseera.
Dhaabbanni UAE fi RSF jalqaba bara kanaa himannaa kana fudhatama dhabsiisus, ogeeyyiin UN garuu amanamaa ta’uu himan.
“Ji’oota sadan kana keessatti sochii konkolaattota gargaarsa namoomaa karaa koridoorii hunda itti dhiyeenyaan hordofaa turre, koridoorichi ammallee miidhaa jala akka jiru, ammallee gargaarsa namoomaa malee kaayyoo biraatiif akka oolu ragaa barbaachisaa arganne,” jechuun Hassan ibsa kennaniin dubbatan.
Gaaffii dhiyaateeeef deebii kennaniin, murtoon dhumaa haala Adree irratti kennamu hanga Sadaasa 15tti akka ifoomu ibsaniiru
Mootummaan Sudaan kenniinsa gargaarsaa haala mijeessuuf kutannoo akka qabu cimsanii kan ibsan yoo ta’u, hanqina maallaqaa fi argamuun milishaa itti fufee jiru gufuulee gurguddaa ta’uu isaanii ibsaniiru.
“Qormaanni lakkoofsa tokkoffaan maallaqa, qormaanni lakkoofsa lama ammoo dhimma sarara qaxxaamuraa dha,” jechuun, buufatawwan sakatta’iinsa milishaa guutuu Sudaan keessatti hin to’atamne konkolaattota gargaarsa namoomaaf karaa nageenya qabu akka walxaxaa taasisu ibsaniiru.
Yaaddoon jiraatus, Hasan mootummaan Sudaan mariif banaadha jechuun ibseera.
“Nuti banaa taanee jirra, filannoowwan waraana deemaa jiru kana xumuruu danda’an kamiyyuu ilaaluuf qophiidha, sababiin isaas kun biyya keenya, amma guyyaa guyyaan badiisa akkasii jala jirti waan ta’eef,” jechuun dabaluu isaanii BBC’n gabaaseera.
