ONM-ABO Amajjii 10, 2025
Pirezidaantiin Libaanos haaraa filataman Jooseef Awun Kamisa kaleessaa imaammata ittisaa bal’aa haleellaa Israa’el qolachuuf akkasumas biyya ollaa Siiriyaa waliin mari’achuuf gaafatan
Awun Kamisa kaleessaa paarlaamaa Libaanosiin kan filataman yoo ta’u, erga Pirezidaantiin Misheel Awun Onkoloolessa bara 2022 aangoo gadhiisanii asitti waggoota lamaa oliif bakka duwwaa siyaasaa ture xumureera.
“Qaamoleen hundi imaammata ittisaa bal’aa mootummaan qabannaa Israa’el akka dhaabuu fi weerara isaa ofirraa deebisuuf dandeessisu irratti akka mari’atan nan afeera,” jechuun Awun haasaa eebbaa paarlaamaaf taasisaniin dubbataniiru.
Kibba Libaanos, naannoo Bekaa, naannoo kibba Beerut, fi naannoolee biroo guutuu biyyattii keessatti haleellaa Israa’eliin barbadaa’an deebisee ijaaruuf waadaa galaniiru.
“Akka Ajajaa Ol’aanaa Raayyaa Ittisa Biyyaatti mirga addaa mootummaan meeshaa waraanaa qabachuu irra deebi’ee mirkaneessa,” jechuun aangoo mootummaa mirkaneessuuf waadaa galuu isaanii jala sarare.
Walitti dhufeenya Siiriyaa waliin qaban irratti kan dubbatan Awun, “Mootummaa Siiriyaa waliin marii cimaa jalqabuu fi saboota keenya gidduutti hariiroo fayya qabeessa uumuuf carraa qabna” jedhan.
“Kabaja abbaa biyyummaa fi walabummaa biyyoota lamaanii kabajuu, daangaa kallattii lamaan mirkaneessuu, dhimma keessoo walii gidduu seenuu dhiisuu, fi dhimma namoota dhabamanii” dabalatee mata dureewwan ijoo hedduu ibsaniiru.
Awun dhimma baqattoota Sooriyaa kan Libaanos irratti dhiibbaa jiraachuu qaba jedhanis furuun barbaachisaa ta’uu cimsanii dubbataniiru.
Rakkoo kana furuuf Siiriyaa fi hawaasni addunyaa waliin tumsi akka godhamu dhaamaniiru.
Pirezidaantiin haaraan kun dhimma kana “yaada sanyummaa ykn mala gadhee irraa bilisa ta’ee” furuun barbaachisaa ta’uu cimsanii ibsuun, mootummaa fi paarlaamaa Libaanos itti aanu waliin ta’uun mala ifa ta’ee fi hojiirra ooluu danda’u hundeessuun baqattoota gara biyya isaaniitti akka deebi’an haala mijeessuuf waadaa akka qaban ibsaniiru.
