ONM-ABO Gurraandhala 10, 2025
Gara jabeeyyiin ergamtoota murna PP dabaa fi hammina malee gaarummaa tokko saba irraa dhalataniif yaadanii kan hin beekne barcuma Abiy Ahimed tiksuuf jecha dhiiga qulqulluu dhangaalaasuu kan aadeeffatan, saba ulfoo fi guddicha Gaanfa Afiriikaa uummata Oromoo hidhaa, ajjeechaa, saamichaa fi dararaa ulfaataa garaa garaa irraan ga’uun jiruu fi jireenya isaa mancaasaa jiru.
Ergamtootni Bilxiginnaa godina Booranaa aanaa Goomolee keessatti Amajjii 24, 2025 irraa kaasee gandootaa akka Bildiimii Raasoo, Dhakaa Barruu, Tulaa Wayyuu, Tulluu Qobboo, Dhaddacha Quufaa, Buuyyaa fi Suruphaa Baaddiyaa keessatti maqaa deggertoota Waraana Bilisummaa Oromooti jedhuun uummata irratti hidhaa fi reebicha hammeessanii jiraachuu maddeen ONM’f gabaasan.
Kana malees dhiftoonni PP kunneen namoota siyaasa kam keessaa hirmaannaa hin qabne maatii qabsaa’otaati jechuun loon isaanii jalaa qalachuu, manneen irratti gubuu, kaan ammoo hidhaatti galchanii dararaa jiraachuu fi yeroo WBO’n haleellaa irratti geggeessu dura dhaabbatanii loluu irra fuula isaanii gara uummataatti deebisuun jiruu fi jireenya ilmaan Oromoo mancaasaa jiru jechuun maddeen dabaluun Arraata Biyyoolessa Oromiyaatti himan.
