ONM-ABO Waxabajjii 22, 2025
Naannoo Beenishaangul Gumuz bulchiinsa magaalaa Asoosaa fi naannawaa ishee keessaa murni Bilxiginnaa ilmaan Oromoo sababoota adda addaan Oromiyaa keessaa baqatanii gara sana deemuun jiraatan hedduu bakkeewwan hojii warqee baasuu, hojii humnaa hojjetan, waajjiraalee mootummaa, mannen barnootaa Yuunivarsiitii, kolleejjiiwan adda addaa fi daandii gubbaa akkasumas bakka manneen kireeffatanii ukkaamsuun hidhaatti guuraa akka jiran jiraattonni himaniiru.
Akka jiraattotni jedhanitti, irra jireessaan namoonni ukkaamfaman dargaggoota ta’uu himuun, namootni kunneen maqaa “hojiiwwan loojistikii WBO’f hojjjettu, meeshaalee adda addaa as-keessaa bituun dhiyeessituu fi yeroo waraanni keenya as irraa gara naannoo Oromiyaatti imalu hordofuun eeruu laachaa jirtu kan jedhuun yoo ta’u, haalli sarbamiinsa mirga namoomaa guutummaatti naannichaa keessatti adeemaa jirus daran yaaddessaa ta’uu dubbatu.
Ilaalchi sanyummaa kan murna Bilxiginnaa adda taasisu tokko sabaa fi sab-lammoota jiran cufa keessaa Oromoo addatti fo’uun amantii, duudhaa, safuu, eenyummaa, hawaasummaa fi kanneen biroon qooduun bakkeewwan cufatti jumlaan ukkaamsuun hidhuu, akka bineensaatti ajjeesuu, dirqiin mooraa waraanaatti galchuun gidirsuu fi dhabamsiisuun maatii ala ilaalchisaa hambisuudha.
