ONM-ABO Waxabajjii 28, 2025
Ergamtoonni sirna garboomfataa PP Waxabajjii 25, 2025 aanaa Diinshoo magaalaa Diinshoo irraa maqaa sakattaan bobba’uun halkan toora sa’a 4:30’tti WBO’tu nutti dhufe maqaa jedhuun walii isaanii irratti qarqara magaalaa Diinshoo Paarkii Biyyaalessa Diinshoo cinatti dhukaasa walitti banuun miidhaa jabaa wal irraan ga’anii jiraachuu maddeen ONM’f eeran.
Yeroo ammaa kanas kanneen du’an awwaallachuun madoo isaanii fi kanneen kufanii caccaban Hospitaala magaalaa Roobeetti akka yaalamaa jiranii fi sababa kanaanis walitti bu’iinsi guddaan gidduu isaaniitti uumamuun burjaajii hamaa keessa wal galchanii jiraachuu odeessi keessoo isaanii ONM’n qaqqabe ni addeessa.
Guyyaa irraa gara guyyaatti lubbuu walii obbaasaa kan oolan loltoonni Bilxiginnaa shakkii hariiroo WBO qabdaa fi hojiilee diinummaa mooraa keenya keessa taa’uun hojjetta kan jedhu akkasumas bobbaa irratti hubannoo dhabuun haleellaa wal irratti taasisuun lubbuu walii galaafachaa akka jiranis gabaasni ONM yeroo yeroon isiniif dhiyeessaa jiru nii mul’isa.
