ONM-ABO Adooessa 12, 2025
Aanaa Abee Dongoroo ganda Hoomaa Gaalessaa bakka addaa Falmii jedhamu irraa hidhattoonni Amaaraa gargaarsa murna Bilxiginnaan utubamanii hidhannoo guutuun hawaasa Oromoo lafa irraa duguuguu irratti xiyyeeffatan, Adoolessa 5, 2025 qonnaan bultoota Oromoo maqaan isaanii:
- Obbo Umaroo Qaasimoo jalaa qorqoorroo baallee 60,
- Obbo Mu’aas Ibraahim jalaa boqqolloo kuntaala 4, qamadii fi xaa’oo kuntaala 1,
- Obbo Galaanoo Hasanee jalaa shonkoraa hundee 60 fi
- Obbo Abdurramaan Muummee jalaa immoo, qabeenya mana keessaa hunda saamanii deemuu
namoonni itti dhiheenyaan beekan Arraata Biyyoolessa Oromiyaatti himanii jiru.
Gandoota aanichaa hunda keessatti hidhattoonni Amaaraa maqaa ‘Faannoo’ jedhu moggaafachuun socho’an kunneen, hiraarsaa yeroo yeroon hawaasa Oromoo irratti raawwatan jabeessuu fi addatti immoo gandicha irratti xiyyeeffachuun hawaasa Oromoo qe’ee fi qabeenya irraa buqqisuun, saamuun, ajjeesuu fi ukkaamsanii qarshii gurguddaa gaafachuun dararaa jiraachuu fi qaamni hanga ammaatti isaaniif birmachaa jiru akka hin jirres itti dabaluun himaniiru.
