ONM-ABO Hagayya 3, 2025
Lolaa fi sigiga lafaa kaaba Veetnaam bulchiinsa Diyen Biyen keessatti mudateen yoo xiqqaate namoonni saddeet kan du’an yoo ta’u, namoonni sadii ammoo achi buuteen isaanii dhabamuu Dhaabbanni Oduu mootummaa Veetnaam Sanbata kaleessaa ibseera.
Roobni cimaan Kamisaa fi Jimaata gidduutti roobe kutaalee bulchiinsa kanaa hedduu keessatti lolaa hamaa kaaseera.
Gandoonni hedduun wal irraa citanii kan jiran yoo ta’u, maatiin dhibbaan lakkaa’aman hatattamaan bakka sanaa baafamaniiru.
Aangawoonni naannoo fi gareewwan baraarsaan namoota achi buuteen isaanii dhabaman barbaaduu fi hawaasa balaa kanaan miidhaman deggaraa jiru.
Jiraattonni madaa’an hedduunis gara hospitaalaatti geeffamaniiru.
Ganda Hang Pu Shii keessatti manneen 14 guutummaatti kan haxaa’aman yoo ta’u, gandoonni 30 ammoo sababa addaan cituu daandiitiin kan hin dhaqqabne ta’aniiru.
Itti aanaan muummicha ministeeraa Tiraan Hong Ha naannolee balaan kun mudate daawwachuun jiraattota kana eeguuf carraaqqiin hunda akka godhamu gaafataniiru jechuun Anaadooluun gabaaseera.
