ONM-ABO Caamsaa 6, 2023
Ilmaan Oromoo gaaffii mirga abbaa biyyummaa gaafachuu fi mirga hiree murteeffannaaf qabsoo geggeeffamaa jiru irraa duubatti deebisuuf, kutaalee Oromiyaa mara keessatti waraanni goolessaan PP addatti ilmaan Oromoo qofa irratti xiyyeeffachuun hidhaa fi ajjeechaa raawwachaa jira.
Ajjeechaan Oromiyaa keessatti Oromummaa sababa godhate ilmaan Oromoo irratti hammaachuun, baha Shaggar ona liiban Cuqqaalaa keessatti kaleessa jechuun Caamsaa 5, 2023 dargaggoota lama waraanni weerartuun bilxiginnaa rasaasaan rukutanii ajjeesuun beekameera.
Dargaggootni ajjeefaman kunneen Jufaaraa Bokonee fi Qorichoo Dorfosee kan jedhaman dargaggoota abdii fi egeree Oromiyaa yoo ta’an, gochi sirnichaa kunis tooftaa ittiin qabsoo uummata Oromoo duubatti deebisan tolfachuu fi dargaggoota anniisaa qabsoo Oromoo irratti xiyyeeffatanii ajjeesuunis uummaticha lafa irraa balleessuuf yaalii taasifamaa jiru ta’uu akeeka.
