ONM-ABO Hagayya 4, 2023
Murni Ilmaan namaaf naasuu hin qabne dhiiga lammiilee nagaa dhangalaasuun bulchiinsa aangoo isaa dheereffachuu barbaadu bilxiginnaan, bakkoota waraana isaa itti bobbaasu maratti daa’immanii hanga maanguddootti ajjeessuun qe’ee Oromoo gadda uffachiisaa oola.
Haaluma kanaan godina baha Wallaggaa aanaa Giddaa Ayyaanaa ganda Jaangirii jedhamu keessatti dheengadda Hagayya 2, 2023 waraanni murna bilxiginnaa tarkaanfii WBO’n humna isaanii irratti fudhate haaloo ba’uuf namoota nagaa kan maqaan isaanii maanguddoo Geetachoo Tarrafaa, obboloota lama kan umriin isaanii waggaa 15 gad ta’e Maariyaam Lammeessaa fi Waaqtolaa Lameessaa jedhaman naasuu tokko malee rasaasa itti roobsuun ajjeesaniiru.
Heera impaayerattiis ta’e waliigaltee idil addunyaa kan hin kabajne bilxiginnaan ajjeessuu, ajjeessee reeffa dhorkachuu, bineensa nyaachisuu, reeffa gubuu, mana waliin namoota gubuu fi cubeen qaluun ajjeechaa sukkanneessaa ilmaan Oromoo irratti raawwachaa jiraachuun taatewwan ilmaan Oromoo irratti waraana bilxiginnaan raawwatan ragaa dha.
