ONM-ABO Fulbaana 9, 2024
Keessattuu aanaalee akka Gindabarat, Abuunaa Gindabarat, Cobii, Jalduu Meettaa Wal-qixxee, Meettaa Roobii, Warra Jaarsoo fi Darraa keessatti murni bilxiginnaa guyyoota lamaan darban irraa eegalee meeshaalee gurguddaan hawaasa reebaa jiraachuu maddeenii fi jiraattonni ONM’tti himan.
Akka jiraattonni fi maddeen jedhanitti meeshaalee akka Zu-23 fi Moortera qarree irraa tilmaamaan qe’ee hawaasaatti darbachaa akka jiran himuun, haleellaa kanaanis miidhaan qabeenyaa namoota fi lubbuu namaa irra qaqqabuu dubbatan.
Addatti ammoo guyyaa kaleessaa fi dheengaddaa qofa aanaa Warra Jaarsoo, Darraa fi Gindabarat qofa keessatti meeshaaleen kunneen guyya guyyaan hawaasa nagaa irratti darbatamaa akka oolee fi miidhaa jabaan qaqqabuus dabaluun ibsaniiru.
Dabalataanis qabeenyaan hawaasaa midhaan ooyiruu irratti badaa akka jiruu fi saawwan hedduun illee akka malee miidhamaa jiraachuu himaniiru.
Duulli waraana Bilxiginnaa kun akka lola daangaa irratti geggeeffamaa jiruutti meeshaa gurguddaan hawaasa nagaa irratti dhukaafamaa jira, hawaasni hedduunis lubbuu isaa oolfachuuf gara dawoon tokko tokko jirutti baqachaa jiraachuun barameera.
