ONM-ABO Fulbaana 9, 2024
Duula duguuggaa sanyii saba Oromoo irratti geggeessaa kan jiran loltootni Bilxiginnaa goleewwan Oromiyaa mara keessatti ilmaan Oromoo ajjeesuu, hidhuu fi dararuu hojii idilee isaanii taasifatanii jiru.
Haaluma kanaan, Fulbaana 7, 2024 waraanni goolessituu Bilxiginnaa godina Lixa Wallaggaa aanaa Lataa-Sibuu magaalaa Warra Jirruu jedhamu keessatti dargaggoo maqaan isaa Guutamaa Alamaayyoo jedhamu badii tokko malee akka bineensaatti rasaasa itti roobsuun ajjeesuu maddeen keenya himan.
Akka maddeen himanitti, “dargaggoon kun nama siyaasa kam keessaayyuu qooda hin qabnee fi hawaasa keessatti jaallatamummaa guddaa qabu yoo ta’u waraanni sirna dhableessi PP badii tokko malee mana jireenyaa isaatii baasuudhaan ajjeesanii gatan” jechuun Arraata Biyyooleessa Oromiyaatti himaniiru.
