ONM-ABO Gurraandhala 2, 2025
Aanaa Baakkoo Tibbee keessatti ergamtoonni Bilxiginnaa bututtuu impaayera Itiyoophiyaa suphuuf ilmaan Oromoo irratti saamichaa fi dararaa hammeessuun, ganda Bahaarii Aabboo jedhamu keessaa Amajjii 31, 2025 “maatiin keessan gibira hin kaffalle” jechuun dargaggoota hedduu dhimma dhuunfaa isaaniif deeman daandii irraa qabuun, “maatii keessanitti bilbilaatii akka isaan dhufanii kaffalan itti himaa” “Isinis yeroo isaan qarshii fidanii dhufan baatu” jechuun ugguranii rakkisaa kan turan ta’uu jiraattonni Arraata Biyyoolessa Oromiyaatti himan.
Ergamtoonni Bilxiginnaa saamichaaf bobbaafaman kunneen, sodaa WBO’f jecha akka fedhan gara gandoota baadiyyaa deemanii saamuu waan hin dandeenyeef, seensa magaalaa daandii irraa mana kireeffachuun, wayita hawaasni gara magaalaa deemu eeggatanii saamichaa fi dararaa ulfaataa irraan gahaa jiraachuun eeramee jira.
