ONM-ABO Bitootessa 12, 2025
Hidhattoonni adda ba’uu Paakistaan keessa socho’an Kibxata kaleessaa goolama itti fufee jiruun imaltoota baaburaa dhibbaan lakkaa’aman Kibba Lixa Paakistaa booji’an.
Hidhattoonni kun naannoo fagoo fi gaarreen bulchiinsa Balochistan kan Afgaanistaan fi Iraan daangessu keessatti baabura to’atan.
“Imaltoonni 450 ol ta’an namoota qawwee qabaniin booji’amaa jiru,” jechuun qondaalli baaburaa olaanaan Muhammad Kashif AFPtti himaniiru.
Itti dabaluudhaanis, “Imaltoonni kun dubartootaa fi daa’imman dabalata” jedhan.
Haleellaan kun kan raawwatame Waraana Bilisummaa Balooch (BLA) kan walabummaaf falmaa jiruu fi qabeenya naannichaa irraa bu’aa argachaa jira jechuun himate.
Akka gareen xiinxaluu Islaamaabaad keessatti argamu Center for Research and Security Studies jedhutti bara 2024tti haleellaa Paakistaan keessatti raawwatameen namoonni 1,600 ol du’aniiru.
Haleellaa qindoomina qabu bara darbe kan baay’inaan saba Punjaabiin irratti xiyyeeffateen yoo xiqqaate namoonni 39 ajjeefamaniiru.
Ji’a Sadaasa keessa, BLAn buufata baaburaa guddaa Quyetta keessatti boombii dho’eef itti gaafatamummaa kan fudhate yoo ta’u, haleellaa kanaan loltoota 14 dabalatee namoota 26 ajjeefamuu AFPn gabaaseera.
