ONM-ABO Ebla 25, 2025
Baha Wallaggaa aanaa Leeqaa Dullachaa ganda Horoo jedhamu keessaa loltoonni Bilxiginnaa Ebla 21, 2025 qonnaan bulaa maqaan isaa Mahaammad Shariif jedhamu garmalee reebuun, mana jalaa cabsanii qarshii 20,000 saamanii deemuu jiraattonni gandichaa Arraata Biyyoolessa Oromiyaatti himanii jiru.
Ganduma sana keessaa maqaa “hidhata Waraana Bilisummaa Oromoo qabdu” jedhu sababeefachuun qonnaan bultoota maqaan isaanii:
- Jamaal Ahimad,
- Turee Adamee,
- Ibraahim Muusaa,
- Jawaar Ibroo
kanneen jedhamanii fi qonnaan bultoota baay’inaan 10 ta’an ukkaamsuun hanga ammaatti achi buutee dhabamsiisanii jiraachuun himamee jira.
Guyyaadhuma sana loltoonni naamusa hin qabne kunneen “hidhata Waraana Bilisummaa Oromoo” qabdu jechuun dubartoota maqaan isaanii Rafiiqaa Muummee fi Feeruzaa Muummee jedhaman erga qabanii booda, halkan da’eeffachuun ganda Hordaa Ambaltaa geessanii mana barumsaa Ambaltaa jedhamu keessatti humnaan qabanii gudeeduu jiraattonni gandichaa Arraata Biyyoolessa Oromiyaaf eeranii jiru.
