ONM-ABO Adoolessa 24, 2025
Dhaabbanni Itiyoo telekoom handhuura Oromiyaa kan taate magaalaa guddittii Finfinneetti argamu, yeroo garaa garaatti hojjettoota tajaajila maamilaa ta’an irratti badii naamusaa malee sababa adda addaa irratti funaanuun akka hojii gad lakkisaniif dirqisiisaa jiraachuu hojjettootni rakkoon kun irra ga’e Arraata Biyyooleessa Oromiyaatti himaniiru.
Akka hojjettoota dhaabbatichaa hojicha irraa ari’atamaa jiran irraa odeeffannetti, dhaabbatichi ilaalcha siyaasaan hojjettoota yakkuu fi akka hojjettoonni haamilee fi kaka’umsaan hojii isaanii hin hojjenne doorsisuu, shakkii fi ija siyaasaatiin ilaalanii miidhaa irratti raawwachuuf tattaaffiin godhamu guddaa ta’uu himan.
Kana malees dhaabbaticha keessatti namoonni ga’umsa ogummaa fi muuxannoo hojii qaban irratti hundaa’anii gara gulantaa itti aanutti guddachuuf ga’umsaa fi dandeettii qabaniin osoo hin taane akkaataa walitti dhufeenyaa fi ija wal beekiinsaa akkasumas guddinni firummaa irratti hundaa’e geggeeffamaa akka jiru miidhamtoonni kunneen himaniiru.
Hojjettoonni kunneen kanaan duras tajaajila ogummaa argachuu qaban dhorkamanii akka turan himanii kan turan yoo ta’u, dabalataanis gochi akkasii farra mirga namoomaa fi diina tokkummaa keenyaati waan ta’eef ammumatti akka nurraa dhaabbatuuf wal taanee akka dura dhaabbannu jechuun daabaluun ibsaniiru.
