ONM-ABO Fulbaana 17, 2025
Roobni cimaan biyya Eeshiyaa Kibbaa kana rukutuu itti fufuun sa’aatii 24 darban keessatti kutaalee Hindii adda addaatti yoo xiqqaate namoonni sagal du’uu isaanii qondaaltonni Kibxata kaleessaa ibsaniiru. Kunis yeroo roobaa itti fufee jiru kana keessatti lakkoofsi namoota waliigalaa hanga ammaatti du’anii 450 ol ta’eera.
Roobni cimaan, lolaa cimaa fi sigiga lafaa uumuun tokkoon tokkoon isaanii kutaa dhiha Mahaaraashtraa fi kutaalee kaabaa Himachal Pradesh fi Uttarakand keessatti lubbuun namoota sadii du’uun gabaafameera.
Mahaaraashtraatti sa’aatii 24 darban keessatti namoonni 100 ol bakka isaanii irraa akka baafaman ibsi kutaa bulchiinsa balaa kutaa biyyattii Kibxata ba’e ni mul’isa.
Ministirri Muummee Himachal Pradesh Sukivinder Singh Sukhu akka jedhanitti, Roobni itti fufiinsa qabu Wiixata halkan irraa eegalee aanaalee Mandi, Hamirpur, fi Shimla dabalatee miidhaa bal’aa geessiseera.
Ibsi aanga’oonni balaa Himachal Pradesh kaleessa baasan akka jedhutti, du’a waliigalaa roobaan fi sigiga lafaa dabalatee — bulchiinsa kana qofa keessatti 409 gaheera.
Yeroon roobaa cimaan yeroo baay’ee baatii Waxabajjii irraa eegalee ji’a Fulbaana keessa xumuramu kun kaaba Hinditti balaa guddaa kan geessise yoo ta’u, naannoolee biyyattii hedduu keessatti lolaa cimaa fi sigiga lafaa hedduu uumeera.
Kutaa kaabaa Punjaab keessatti lolaa roobaa ka’een lubbuu namoota 50 ol kan galaafate yoo ta’u, namoota kuma dhibbaan lakkaa’aman irratti dhiibbaa geessiseera jechuun Anaadooluun gabaaseera.
