ONM-ABO Sadaasa 17, 2025
Godina Baha Shaggar aanaa Boosat gandoota garaagaraa keessatti gareen ilmaan Oromoo dararuu amaleeffate murni bilxiginnaa namoota nagaa hidhuu fi jiraattota bishaan irraa dhorkuu jabeessanii akka itti fufan jiraattonni Arraata Biyyoolessaa Oromiyaatti himan.
Haaluma kanaan kaleessa ganama sa’aatii 3:00 irratti ganda Nuuraa Haasee bakka addaa Haaseetti loltoonni Bilxiginnaa namoota nagaa siyaasa irraa bilisa ta’an mana isaaniitti dhaquun “isin deggertoota WBO ti” ittiin jechuun namoota sadii maqaan isaanii:
1. Yaamii Gammachuu,
2. Gaashaa Gammachuu,
3. Katamaa Badhaadhaa
kanneen jedhaman ganama kana Sadaasa 16, 2025 humnaan qabanii gara mana hidhaa Siifaatti fuudhanii deemuu isaanii maddeen ifoomsaniiru. Namoonni kun yeroo darbe ji’oota muraasa dura sababa tokko malee WBO deggartu ittiin jechuun har’as ragaa tokko malee hidhaa akka jiran jiraattonni gandichaa ONM’f addeessaniiru.
Itti fufuun ganda Arriiboonaa naannoo daandii Itiyoo Jibuutiitti argamu bakka addaa Caancoo jedhamutti murni Bilxiginnaa uummata gandichaatiin “isin deggertoota WBO ti” waan ta’eef “bishaan hin waraabbattan” ittiin jechuun guyyaa lamaaf bishaan dhugaatii dhorkachuu isaanii jiraattonni gandichaa dubbataniiru.
