ONM-ABO Caamsaa 2, 2023
Bu’aa siyaasaa fi gadaa aangoo isaa dheeraaffaachuuf murni bilxiginnaa waraana isaa uummata nagaatti bobbaasuun ajjeechaa sukkaanneessaa, saamicha fi midhaa garaagaraa Oromiyaa bakkoota adda addaatti raawwataa jiru.
Godina baha Shaggar ona Boosaat keessaatti waraannii weraartuu PP maqaa sakata’insa waraana bilisummaa Oromootiin bobbaa’an naannawaa magaalaa Boolee mooraa tokkoffaa fi shanaffatti namoota Shan yoo ajjeessaan, namoota lama ammoo madeessuuniiru.
Ajjeechaa fi midhaan namoota nagaa kana irra qaqqaabee kun dheengadda Ebla 30, 2023 yoo ta’u, ona Boosat magaalaa Boolee mooraa tokkoffaatti namoota maqaan isaanii Musxafaa Sulxaan, Juundii Hamdaa, Abaatee Indaalaa jedhaman ajjeessuun, Teessoo Aliyii fi Muktar Kadir kanneen jedhaman ammoo maddeessun midhaa qamaa irraan ga’anii jiru.
Magaalaa Boolee mooraa 5ffaa bakka addaa Nuuraa Raphii jedhamuttis Abdii Jamaa fi Ganna Hamaa yakka tokko malee rasaasaa itti roobsuun ajjeessuu jiraattotni Arraata Biyyoolessa Oromiyaatti himaniiru.
