ONM-ABO Fulbaana 29, 2023
Egeree uummatichaaf yaaddessaa ta’aa kan dhufe dhimmi guyyaa guyyaan ajjeefamuu dargaggoota Oromoo daran jabaachuun dacheen Oromiyaa lolaa dhiiga ol adeemtota ilmaan isheetiin dhiqamuun abdiin sabichaa dukkana gabrummaan haguugamaa jira.
Godina Qellem Wallaggaa aanaa Laaloo Qilee ganda Doogannoo Dhummuugaa keessaa kaleessa jechuunis Fulbaana 28, 2023 loltoota impaayerattiin kan qabame dargaggoo Hundumaa Ashuudoo Raggaasaa jedhamu, konkolaataa irraa buusanii fuudhanii erga deemaniin booda ganduma Dooganoo Dhummuugaa bakka addaa Kallisa Maqa Billee jedhamtutti guyyuma kana ajjeefamee gatamuun dhagaa’ame.
Dargaggeessi kun sababa maaliitiin qabamee akka ajjeefame beekamuu baatus, nama nagaa jireenya mataa isaa jiraatu ta’uun isaa kan beekamu yoo ta’u, haaluma goleewwan Oromiyaa cufa keessatti maqaalee garaa garaa itti maxxansuun dargaggoota Oromoo kumaatamaan ajjeessaa jiraniin dargaggeessa kanas gara jabeenya isaaniitiin waraanni sirnichaa ajjeessuun dubbatame.
