ONM- ABO Guraandhala 5, 2024
Duulli ajjeechaa dargaggoota Oromoo irratti raawwatamaa jiru hammaachuun, Lixa Oromiyaa godina Qellem Wallaggaa aanaa Sayyoo ganda Alakuu Bellee bakka addaa Qallii jedhamutti dargaggeessi Oromoo maqaan isaa Ifaa Yaadasaa jedhamu Dheengadda Muddee 3, 2024 loltoota bilxiginnaan ajjeefamuun beekame.
Dargaggeessi kun barataa kutaa 10ffaa yoo ta’u, nama nagaa hirmaannaa siyaasaa keessaa qooda hin qabnee fi mana amantaatti deddeebi’uun yeroo isaa dabarsu, faarfataa Waldaa Guutuu Wangeelaa Alakuu ta’uun himamuun, Osoo Inni hiriyyaa isaa bira bulee ganama gara manaatti galaa jiru waraanni naasuu ilma namaaf hin qabne kunneen lubbuu isaa balleessuun dubbatame.
Golee Oromiyaa cufa keessatti guyyaa irraa gara guyyaatti lubbuun ilmaan Oromoo darbaa jiraachuu gabaasaa kan jiruu fi addatti ammoo dargaggoonni akka bineensa bosonaatti adamfamanii ajjeefamuun itti fufuun walqabatee egereen uummatichaa yaaddessaa ta’aa jiraachuus dabaluun ifoomsaniiru.
