ONM-ABO Waxabajjii 24, 2024
Gamtaan Awurooppaa Jaappaanii fi Kooriyaa Kibbaa waliin walta’iinsa indaastirii nageenyaa fi ittisaa kan meeshaalee waraanaa waliin misoomsuuf kaayyeffate barbaada jechuun Nikkeeyi Dilbata kaleessaa qondaala olaanaa komishinii Gamtaa Awurooppaa wabeeffachuun gabaaseera.
Kunis Gamtaan Awurooppaa biyyoota Eeshiyaa waliin nageenyaa fi ittisa waliin walqabatee tumsa akkasii kan jalqabaa ta’uu isaa gaazexaan daldalaa Jaappaan gabaasa Biraasels irraa baaseen qondaala kana adda osoo hin himin ibseera.
Gamtaan kun dhuma waggaatti Jaappaan waliin waliigaltee sadarkaa ministeerotaatti akka gahu abdiin qaba jechuun, kunis Gamtaan Awurooppaa pirojektoota waloo dhaabbilee Jaappaanii fi Awurooppaatiin bulfaman maallaqaan gargaaruu danda’a jedha Nikkeeyi.
Bakka bu’oonni ministeera haajaa alaa Jaappaan, jila Kooriyaa Kibbaa fi Gamtaan Awurooppaa Tookiyootti argaman gabaasa Dilbata darbe kana irratti yaada kennuudhaaf battalumatti hin argamne.
Jaappaan waggoota dhiyoo asitti babal’ina waraanaa guddaa ta’een indaastirii ittisaa ishee guddisuun, balaa ollaa Eeshiyaa Chaayinaa fi Kooriyaa Kaabaa irraa dhufuuf yaaddoo qabaachuu ibsiteetti.
Tookiyoon Biritaaniyaa fi Xaaliyaanii waliin sagantaa xiyyaara waraanaa sadarkaa olaanaa qabu qopheessuu hundeessuuf bara darbe waliigaltee mallatteessiteetti.
Ji’a kana keessa Jaappaan waltajjii Tumsa Industirii Ittisaa, Fudhachuu fi Itti Fufiinsa Ittisaa U.S.-Jaappaan kan Ebla keessa Muummicha Ministeeraa Fumio Kishida fi Pirezidaantii Joo Baayideniin hundeeffame jalatti tumsa indaastirii ittisaa gadi fagoo uumuu irratti Ameerikaa waliin marii eegalteetti jechuun Rooyiteers gabaaseera.
