ONM-ABO Onkoloolessa 25, 2024
Godinaalee Oromiyaa adda addaatti sarbamiinsa mirgoota namoomaa bifa qindaa’ee fi badiitti hawaasa geessu loltoota koloneel Abiy Ahimediin taasifamaa jiru egeree sabichaatti yaaddoo cimaa ta’ee jiraachuu jiraattonni bakkoota adda addaa irraa rakkoo keessa jiran ibsan.
Godina Qellem Wallaggaa aanaa Sayyoo ganda Riphaa Soyyomaa iddoo addaa Laga Odaa , Laga Shinii fi Shanqatee jedhamuun beekamu bakka uummanni Oromoo baha Oromiyaa irraa rakkoo hoongee fi lola naannoo Somaalee irraa irratti baname dheessuun bakka tokkotti qubatee jirutti waraanni garboomfataan PP Onkoloolessa 22 fi 23,2024 gubaatii manneenii kan baay’inni isaa 36 ol ta’e irratti taasisuun himameera.
Laga Odaatti manneen baay’inni isaa 23, Laga Shiniitti 10 fi fi Shanqateetti ammoo manneen 3 ol ibidda itti shiduun barbadeessuun ifoomeera.
Manneen hawaasaa keessatti uffannaa, nyaata, midhaan gosa addda addaa kan barbadeessan ogguu ta’u, kana malees iddoo addaa Odaa jedhamu irraa maanguddoo ganna 80 olii ibidda shidamaa boba’aa jirutti darbuun miidhaa cimaa irratti taasisuu fi shamarran hedduu irrattis gudeeddii raawwachuun ibsameera.
