ONM-ABO Sadaasa 3, 2024
Haleellaa Israa’el Gaazaa irratti raawwateen yoo xiqqaate lammiileen Falasxiinota dabalataa 55 kan ajjeefaman yoo ta’u, bara darbe irraa eegalee lakkoofsi namoota du’anii waliigalaa 43,314 akka ta’e Ministeerri Fayyaa naannoo sana jiru Sanbata kaleessaa ibseera.
Ibsi ministeerichaa itti dabaluudhaan haleellaa itti fufee jiru kanaan namoonni 102,019 ta’an madaa’uu ibseera
“Humnoonni Israa’el sa’aatii 24 darban keessatti haleellaa raawwateen namoota 55 ajjeesuun 192 madeessee” jedheera ministeerichi.
Itti dabaluudhaanis, ”Namoonni hedduun ammallee caccabaa jalaa fi daandii irratti qabamanii jiru, sababiin isaas baraartoonni isaan bira gahuu waan hin dandeenyeef,” jedheera.
Murtee Mana Maree Nageenyaa Mootummoota Gamtoomanii dhukaasa hatattamaan akka dhaabbatu gaafatu cabsitee, Israa’el erga haleellaa garee Falasxiin Hamaas Onkoloolessa 7, 2023 raawwatameen booda haleellaa gara jabinaa Gaazaa irratti raawwattu itti fufteetti.
Weerarri Israa’el kun uggura itti fufee jiruun hanqina nyaataa, bishaan qulqulluu fi qoricha hamaa ta’e uumeen ummata naannoo sanaa hunda jechuun ni danda’ama buqqisee jira.
Muummichi ministeera Israa’el Beeniyaamin Netaaniyaahuun waraana kana dhaabuu diduu isaaniitiin walqabatee, Israa’elii fi Hamaas gidduutti waliigaltee dhukaasa dhaabuu fi hidhamtoota jijjiiruu Gaazaa irra ga’uuf tattaaffiin gidduu seentummaa fashalaa’eera jechuun the gaardiyaan gabaaseera.
