ONM-ABO Bitootessa 18, 2025
Waraanni impaayera bututaa Itiyoophiyaa suphuuf dhamaatu ergamtoonni Bilxiginnaa kutaalee Oromiyaa cufa keessatti hawaasa jiruu fi jireenya dhorkanii hiraarsaa jiran Bitootessa 15, 2025 aanaa Martii ganda Heellaa Akkiyyaa iddoo addaa Ardaa Littuu jedhamu keessatti hawaasa mana isaanii keessaa guuranii maqaa Waraana Bilisummaa Oromoo wajjin hariiroo qabdu jedhuun reebicha erga irraan ga’aa turaniin booda namoota hedduu qabanii magaalaa aanaa Martii Abboomsaa geessuun waajjira Poolisii keessatti ganamaaf galgala reebaa jiraachuu maddeen ONM’f eeranii jiru.
Namoota hidhamanii jiran kana keessaa kanneen maqaan nu gahe:
- Abbee Haajii,
- Haroo Kadiroo,
- Abdallaa Mahaammad,
- Kaamis Haajii Huseen,
- Makkiyaa Adam,
- Aaliyaa Roobaa,
- Aliyyii Sheek Adam,
- Huseen Sheek Ahimad fi
- Addis Haajii kanneen jedhamaniidha.
Haaluma wal fakkaatuun aanaadhuma Martii ganda Wataroo Diinoo araddoota akka Diinoo, Baqulaa, Baaldii, Harooreettii, Dileebaa, Ittisa, Xeencichoo fi Qarree Jamaa keessatti waraanni Bilxiginnaa kunneen hawaasa magaalaa deemu meeshaalee isaanii irraa saamuu fi ooyiruu isaanii keessa deemanii midhaan isaanii mancaasaa jiraachuus dubbatu.
Kana malees meeshaalee gurguddaa irratti dhukaasuun namoota mana isaanii keessaa weerarsanii baasuun akka isaan manatti hin deebineef ammoo waraana keessa qubsiisuu fi meeshaalee mana isaanii keessa jiru guutuu caccabsuun daa’imman isaanii reebuu fi loon jiraattotaa qalatanii nyaachaa akka jiranis addeeffameera.
