ONM-ABO Waxabajjii 6, 2025
Lukkeeleen PP afaan qofaan nagaa labsaa faallaa isaa immoo gara jabina guddaan hawaasa meesha maleessatti afaan qawwee garagalfachuun saamichaa hanga ajjeechaatti hawaasa Oromoo garmalee miidhaa jiru.
Godina Baha Wallaggaa aanaa Diggaa ganda Biqilaa bakka addaa Maqa jedhamu irraa torban darbe keessa qonnaan bulaa maqaan isaa Obbo Malkaamuu Daggafaa jedhamu jalaa manaa fi meeshaalee hunda waliin jalaa gubanii barbadeessuu jiraattonni gandichaa Arraata Biyyoolessa Oromiyaatti himan.
Qonnaan bulaan kun badii qabaateef osoo hin taane, sababa Oromummaa isaa qofaaf manaa fi meeshaalee mana keessaa erga jalaa barbadeessanii booda;
- midhaan kuntaala 4,
- buna qunnaa 3 fi
- damma kiilogiraama 30 saamanii deemuun ibsamee jira.
Oduu biraatiin, godinuma kana aanaa Waayyuu Tuqaa keessaa loltoonni Bilxiginnaa maqaa sobaa hawaasni keessa hin jirre itti maxxansuun dararaa ulfaataa raawwachaa oolan ganda Angaroo jedhamu irraa torban darbe keessa dargaggoo maqaan isaa Kifilee Tafarii jedhamu irratti reebicha hamaa raawwatanii deemuu namoonni ijaan argan ONM’f eeranii jiru.
