ONM-ABO Amajjii 1, 2026
Pireezidaantiin Somaaliyaa Hasan Sheek Mohaammud gabaasa basaasaa wabeeffachuun naannoon Somaalilaandii adda ba’e Falasxiinota deebisanii qubsiisuu fi buufata waraanaa Israa’el keessummeessuuf walii galuu ishee ibsan.
Tel Aviv Somaalilaandiif beekamtiin kan kennite “baay’ee kan hin eegamnee fi ajaa’iba” ture, jechuun Mohaammud Kibxata darbe Al Jazeeraaf kan himan yoo ta’u, Israa’el bara 1991 booda naannicha akka mootummaa walabaatti beekamtii kennuun himan.
Bara 1991 Somaaliyaa jalaa walabummaa labsite Somaalilaandiin beekamtii idil-addunyaa malee naannoo ofiin of bulchitu qabatamaan socho’aa turte.
Moqaadishoon himannaa walabummaa Somaalilaandii diduun, naannichi qaama Somaaliyaatti akka ilaalu, kallattiin ishee waliin walitti dhufeenyi kamiyyuu akka mirga abbaa biyyummaa biyyattii cabsuutti kaasti.
“Biyya nagaan walitti fiduuf yaalaa turre,” jedhan Mohaammud.
Somaalilaandiinis hariiroo Abrahaam, kan bara 2020 Israa’elii fi Yunaayitid Arab Emireet, Baahireen, Sudaan, fi Morookoo gidduutti mallattaa’ee walitti dhufeenya isaanii idileessuuf akka fudhatte himaniiru.
Israa’el daandii bishaanii tarsiimoodhaan barbaachisoo ta’an kanneen akka Galaana Diimaa, Galoo Galaana fi Galoo Galaana Aden to’achuuf kan barbaaddu yoo ta’u, Somaalilaandiif beekamtii kennuun isheen dhoksaa achitti argamuuf jiru idileessuu qofa akka ta’e pirezidaantiin Somaaliyaa gabaasa basaasaa wabeeffachuun himaniiru.
Wiixata biyyoonni Mana Maree Nageenyaa Dhaabbata Mootummoota Gamtoomanii walgahii ariifachiisaa irratti tarkaanfiin kun Falasxiinota Gaazaa irraa gara biraatti jijjiiruuf kan kaayyeffate fakkaata jechuun yaaddoo qaban ibsaniiru.
Miseensonni mana maree hundi jechuun ni danda’ama beekamtii Israa’el kan balaaleffatan yoo ta’u, US ammoo ejjennoo naannoo addaan ba’e kana irratti qabdu hin jijjiiramne jechuun balaaleffachuu irraa of qusatteetti.

