ONM-ABO Amajjii 14, 2026
Miseensi mana maree olaanaa Veenzuweelaa namoonni 400 ol mana hidhaatii bilisa ba’uu isaanii kan himan yoo ta’u, kunis guyyoota darban keessa hidhamtoonni 60 hanga 70 ta’an qofti gadhiifamaniiru jechuun gareewwan mirgaaf falman kan faallesseera. Tarkaanfii kunis waamicha namoota sababa siyaasaatiin hidhaman bilisa baasuuf godhame gidduutti.
Pirezidaantiin Mana Maree Biyyaalessaa Joorji Roodriigeez kana kan beeksisan Kibxata kaleessa walgahii paarlaamaa irratti.
Hidhamtoonni 400 ol gad lakkifamuu isaanii ibsuun, yeroo murtaa’e garuu hin ibsine.
Roodriigeez fi prezidaantiin Yunaayitid Isteets Doonaald Tiraamp lamaan isaaniiyyuu prezidaantiin Veenzuweelaa Niikoolaas Maaduroo Amajjii 3 humnoota Ameerikaatiin butamuu isaanii hordofuun hidhamtoonni lakkoofsi isaanii hedduun akka sochii nagaa ta’ee bilisa akka bahan dubbataniiru.
Hidhamtoonni siyaasaa Veenzuweelaa hiikuun waamicha yeroo dheeraaf gareewwan mirga falman, qaamolee idil-addunyaa fi namoota mormitootaa ta’ee ture.
Mootummaan Venezu’eelaa yeroo hunda sababa siyaasaatiin namoota akka hidhu kan haalu yoo ta’u, filannoo pirezidaantii bara 2024 irratti mormii ka’een booda namoota 2,000 hidhaman keessaa harki caalaa isaanii gadhiisuu isaa dubbateera.
Gareen mirga namoomaa Veenzuweelaa keessatti hidhamtoonni siyaasaa 800 hanga 1,200 akka jiran tilmaaman, torban darbe irraa eegalee lakkoofsi hidhamtoota bilisa ba’anii 60 hanga 70 gidduutti akka ta’e ibsuun, saffisa suuta jedhu fi hanqina odeeffannoo gadhiifamuu kana marsee jiru balaaleffataniiru jechuun Al Jazeeraan gabaaseera.
